papiro

sfido chiunque a scrivare un papiro co a compagnia de sandro.

locassion: semonso, caxa de francesco baron, xò in taverna.
dopo na serata de studio e organixassion a stimana passà, ieri sera se catemo par tacare scrivare. ae nove. fin ae diexe no se combina gnente. a prima rima salta fora ae diexe e mexa. o savevo. xe sempre difissie scomisiare, ma qua a xe pì dura, ghe xe dei altri ostacoi. de diexe che semo me sento l'unico normae. cioè no normae, me par de essare l'unico che ga finio e scoe. a sqadra conta ben sinque murari. invesse che xe anca uno laureà, ma el lavora in banca poareto. el ga na moroxa bastansa bruta, ansi no, un cesso.
ma e tre toxe che ghe xe sembra quee messe mejo, e ga boni propositi, e tira un poco el caro; xe chealtri 7-8 scavessai che xe fadiga tegnere. no i riesse capire come se scrive un papiro co na storia logica. par lori "bison scrivar spropositi" e xò a contare tutte e stronsade che i se dixe de soito. i ghin ga talmente tante da contar che se podaria morir so sta taverna. el beo xe che i xe na bea compagnia e sea ridemo un bel poco. ma no se va vanti...
gimi e gioni xò a spropositare "qua scata el pompin", "ghe sgozzo", "ndemo al toppe ten", "gnente mae", "toxa, serca de essare pi spezifica", "sarissimo bravi toxi, xe che bevemo".... e in effetti se beve e parecchio anca. ae undaxe e mexa no ghemo scrito gnancora na pagina, ma de bire ghin xe sta bevue xà trenta. un cimitero de botilie e tappi. nessun problema "tanto a toea xe longa". a un serto punto penso che baron ga un camion-frigo. el continua tirar fora bire...
gioni taca far proposte aea ilenia e gimi ruta come ganxina. a ilenia se assa vardare e fa i oci dolsi, gioni salta sol leto de baron (parchè baron ga el leto in taverna) e se ilude de ciavarla.
mateo strusso che bes-cema de cativeria e so morosa vaentina pi magra de na vis-cia che me fa a maestrina so come se fa i papiri... picoeo particoeare xe el primo che ea fa e tra l'altro lo ciama "poesia". el pi picoeo dei strussi xe ancora imbriago daea sena dea classe e el sevita dire che el se ga bevuo sentodiexeeuro al muretto. pa fortuna che manca manuel. "oh, ma qualcuno ga ciamà fabio e citon?" "citon no parchè ale nol ghe piaxe" "te credo no l'è mia cueaton". a un serto punto me acorxo che ghe xe cosma che no ga dito "a" tutta a sera, ma i me dixe che el se gà ciapà un virus in birmania. ga da esser vero e ghe credo, anca parchè l'alcol fa efeto e ghemo tacà scrivare de bruto. me concentro, no ghe xe tempo pa altro. manca un quarto a un boto, casso! el can de baron sbaiina parchè el ga paura del temporae, "che regaeo femo?", ghe xe a procession de quei che va pissare a bira, anca mi me fo do giri de procesion, el can salta sol leto, gioni lo imbrassa, "senti che spuzza da can che te se, fradel", "desso me faria pissar in boca", "oh ma o vestimo come leonida aeora, ahn?", "anca co a spada, lu parla sempre de spade", "e a volta che xera drio saltarme dosso a sottobrazzo-cinghiae?", "frassadina, ciavadina, sgozzadina", "femo a sena dei onti", salta fora a boschiero...

casso no a boschiero no...

"fermi tutti! chi no beve no ze pì me amigo". siensio e terore. qualcuno de ritorno dal cesso se axarda "cossa sucede, cossa xea chea roba la?" "prugna, DC, digestivo lassativo depurante rilassante" "PD, no ghemo magnà gnente, cossa femo, digerimo a bira? mi no bevo" "desso te taxi e te bevi DB, el papiro o finimo doman" "come se o scrivesse mi..." "no, ma finio a boschiero a pena alberto no a tien pì in man". casso, i me ga adotà.

stasera in casa strusso.